Sakata la masheikh wa Uamsho laibuka tena.......Mbunge ataka kujua sababu za kuendelea kushikiliwa ilhali ushahidi ulishakosekana

Sakata la masheikh wa Uamusho walioshtakiwa kwa tuhuma za ugaidi, limeibuka bungeni jana baada ya Mbunge wa Konde, Khatib Said Haji (CUF) kuhoji ni nchi gani ambayo haina tishio la kigaidi inaweza kuwa na mlundukano wa watu wenye makosa hayo kwenye magereza.

“Hapa katika jibu nimeambiwa siku 60 zinatosha kutoa ushahidi na kwamba, kama ushahidi haukupatikana, watuhumiwa waachiwe. Lakini masheikh wa Uamsho wana miaka minne sasa wapo katika magereza na ushahidi umeshindwa kupatikana,” alisema Khatib. 

Alihoji iwapo watuhumiwa hao wanawekwa mahabusu kwa

kuwa wana kesi ya kujibu, au kwa amri ya viongozi wa Serikali ya Mapinduzi Zanzibar (SMZ). 

“Waziri wa vikosi vya SMZ Zanzibar na Makamu wa Rais Zanzibar wamewahi kunukuliwa wakisema kwamba waliwaleta masheikh Tanzania ili wanyee ndoo katika magereza ya Tanzania Bara.” Alisema Khatib Said Haji

Akijibu swali hilo, Naibu Waziri wa Mambo ya Ndani, Hamad Yusuph Masauni alisema kesi za watuhumiwa hao zipo mahakamani na kwa taratibu hawaruhusiwi kujibu hoja kortini. 

Hali hiyo ilisababisha baadhi ya wabunge kuguna bungeni hali iliyomfanya Waziri wa Katiba na Sheria, Dk Harrison Mwakyembe kuongezea majibu ya swali hilo.

Dk Mwakyembe alisema ni kweli kwamba sheria inataka mahakama kama upelelezi haujakamilika ndani ya siku 60, mtuhumiwa kuachiwa huru, lakini Mkuu wa Upelelezi wa Mkoa (RCO) anaweza kupeleka maombi mahakamani ya kuongezwa siku. 

Alisema baada ya hapo suala linakuwa chini ya Mkurugenzi wa Mashtaka (DPP) na kwamba, kulingana na uzito wa shtaka anaweza kuomba kuongeza muda. 

“Suala la ugaidi si dogo ni la kimtandao na kuutambua huo mtandao si suala dogo,” alisema Dk Mwakyembe